شنيك

السلام عليكم ورحمة الله وبركاتة

هاد الشنيك جربتو وجا غزال والوصفة خديتها من عند الاخت امنار 

المقادير :

نصف كيلو طحين فورص

ربع معلقة صغيرة الملح

قليل من الماء الدافىء

4 معالق كبار سنيدة

1 فاني

1 بيضة

2 معالق كبار خميرة الخبز

2 معالق كبار الزبدة او50 غرام

1خميرة الحلوى

لتوراق العجين:

200غرام الزبدة مخلطة

ب1خميرة

و1 فاني

للحشوة

كريم باتسيير

الفواكه المرقدة

اصفر البيض لدهن شنيك

الطريقة:

نخلطوا جميع مقادير العجينة اللي ذكرت اضافة الماء الدافىء حتى تجتمع و ندلكوها مزيان تم نقسموها الى 6 كويرات متساوية كناخدوا كل كويرة و نبسطوها و نورقوها بخليط الزبدة مع الخميرة و الفاني و نشكلوهم بحال المسمنة و هكدا بالنسبة للكويرات كلهم تم نبسطوا المربعات و نعملوا واحدة فوق واحدة و احنا كنعملو الزبدة حتى نكملوا المربعات كلهم و نكملوا خليط الزبدة خاص داك 200 غرام الزبدة كلها تدخل في العجين اثناء التوراق كنخليوها ترتاح و من الافضل تدخليها للثلاجة كتكون افضل فالتوراق و نوجدو الكريم باتيسيير انا كناخذ البودرة الجاهزة كنخلطها كيف معروف مع الحليب و السكر و ممكن نضيف عليها اي نكهة و نديرها تطيب مع التحراك المستمر حتى تعقاد كنجبدو العجينة ديلانا من الثلاجة على بال متبرد الكريمة (باش متقطعش لينا العجين) كنطلقو العجينة فوق سطح مرشوش بشوية فورص و ندوزو عليها الدلاك و نحاولو ما امكن نشكلوها بحال مستطيل باش تجي ساهلة فاللف حتي تعطينا سمك مناسب تقريبا كيكون بحجم راس الاصبع وناخذو الكريم باتيسيير و نسرحوه فوقها و بعدها ندردرو عليها الزبيب و نلويوها بحال الزربية بدون ضغط باش متخرجش الكريم باتيسيير ثم الى الفريكو حتى تقساح لينا العجينة باش تجينا ساهلة في التقطاع على شكل شنيك و تبارك الله كلشي كيعرف للطريقة تم نوضعوهم في لاطة مدهونة و نخليوهم حتى يخمروا شي ساعة الوقت تم ندهنوهم تم الى الفرن من بعد مكيطيبو كندهنهم بشوية الكونفيتير و ندردروا عليم شوية اللوز

ملاحظة :

انا ضاعفت المقادير يعني ضربتها ف 2 و عطاتني 40 شنيكة و فبلاصة الفواكة المرقدة او المعسلة عملت الزبيب و كندهن بكونفتير المشماش بدل العسل لانه كيضيف نكهة خاصة

وممكن تعملو كريم باتسيير في الدار بدل تشروه