طاجين بكويرات الكفتة والروز

السلام عليكم ورحمة الله وبركاته

اليوم غادي نحط تجربتي لطاجين الكفتة والروز

الوصفة خديتها من اخت 

الله يجازيها بخير وجات غزالة

كنحتاجو

تقريبا من 400 حتى ل 500 غ كفتة معطرة

2حبات بصلة متوسطة و مشلدة

معدنوس

حامض مصير

العطرية ملح ابزار قليل دسكين جبير والسودانية و شوية الخرقوم زعفران

كاس الروز المزيان معامرش مغسول مزيان

الطريقة

كنخلطو الكفتة مع الروز مزياان و نشكله كويرات بحجم بيضة فطويجين او طاوة نعملو البصلة مع شوية الزيت مخلطة رومية و بلدية

نخلوها تنزل غير شوية نضيفو التوابل و نصف كمية المعدنوس ونخلطوها مزيان

ونضيفو كويرات الكفتة ونضيفوا زوج كيسان و نص ماء و نعبروا بنفس عبار كاس الروز

نخليو الطاجين على عافية مجهدة غير تغلى نقصوليها مزيان

و نخليوها تطيب على عافية مهيلة تقريبا من 20ل 25د حتى توقف على زيتها

 باخر 5د نضيفوا المعدنوس الي بقى وربع الحامض مصير و الزيتون و نخليوها تغلى و نطفي عليها